Денес го празнуваме светиот маченик Валентин, светителот кој останал запаметен по својата љубов, но заборавен благодарение на комерцијализацијата и човечките похоти.

Светиот свештеномаченик Валентин

Беше епископ во италијанскиот град Интерамна. Го исцели болниот брат на римскиот трибун Фронтан. Кога се разболе Херимон, синот на познатиот философ Кратон, посоветуван од Фронтан Кратон го повика Валентин во Рим. Херимон беше сиот згрчен, така што главата му беше свиткана меѓу колената. Валентин се затвори во собата со болниот и цела ноќ ја мина во молитва. Утредента го изведе Херимон наполно здрав и го предаде на татко му. Тогаш се крсти Кратон со целиот свој дом и со своите тројца ученици. Херимон го остави татковиот дом и тргна по Валентин. Тогаш се крсти и синот на римскиот епарх Авундиј. Разјарен од ова, епархот го фати Валентин и откако го мачеше го уби со меч. Тогаш беа убиени и тројцата ученици на Кратон: Прокул, Евив и Аполониј. Нивните тела ги зеде Авундиј и чесно ги погреба. Сите пострадаа во 273 година и станаа граѓани на Небесното Царство.

Од љубов кон ближните, заради нивното спасение, светиот Валентин не го пожали ни својот живот. Ги исцели нивнте рани, им го врати духовниот вид, и ги доведе до Царството Небесно, покажувајќи најголемо сведоштво за Царството Небесно – својот живот.

Свети свештеномаченик Валентин, моли се и ние да ја спознаеме вистинската љубов, која ќе продолжи во вечноста.