Возљубени, никој да не очајува за своето спасение!

Порокот не е во нашата природа,

ние сме создадени со разумна волја и слобода.

Ти си како цариникот – можеш да станеш Евангелист.

Ти си како богохулникот – можеш да станеш Апостол.

Ти си како разбојникот – можеш да го здобиеш Рајот.

Ти си како мудрецот – можеш да Му се поклониш на Христос.

Не постои порок или грев што не може да се искупи преку покајание,

затоа и Христос ни ги посочува највисоките степени на нечестието,

за да не може никој, на кој било начин да се оправда.

Не вели ми: „Што да правам, загинувам?“

Не ми кажувај: „Згрешив, што да сторам?“

Имаш Лекар, Кој стои над болеста;

имаш Лекар, Кој ја победува силата на болеста;

имаш Лекар, Кој лекува со еден замав,

Кој исцелува со едно посакување;

имаш Лекар Кој може и сака да лекува!

Ако Он те создал од небитие и ти дал живот,

тогаш колку повеќе може да те поправи и исцели,

кога веќе постоиш и си повреден.

Ти не можеш да кажеш на кој начин си создаден,

како што не можеш да објасниш на кој начин се очистуваат гревовите.

Ако огнот, кој падне меѓу трње, изгорува и уништува сѐ,

тогаш колку повеќе е возможно за волјата Божја да ги oчисти и

да ги искорени нашите прегрешенија, правејќи и од грешникот свет човек!?

Не прашувај како тоа станува, не испитувај како тоа се извршува,

но верувај во чудо! Ќе речеш:

„…и многу големи се моите гревови – но кој е без грев!?“

Признај дека си згрешил, и тоа ќе ти послужи, на почетокот, за поправање.